O Concello de Outeiro de Rei instalou cinco desfibriladores nalgúns dos edificios públicos máis concorridos do municipio. A escola infantil, o colexio, o pavillón polideportivo, o campo de fútbol e a casa consistorial contan desde este mes con esta dotación esencial en caso de parada cardiorrespiratoria.
O investimento destinado a estes dispositivos ascendeu a 11.800 euros, dos cales 7.900 foron achegados polo Concello, e o importe restante pola Xunta de Galicia.
Con todo, o orzamento non se cinguiu á compra dos dispositivos, senón que 3.900 euros do mesmo destináronse á realización de cursos de formación, para que todas as persoas que frecuentan as instalacións mencionadas saiban utilizalos.
Así, segundo indicou o alcalde do municipio, José Pardo Lombao, recibiron esta formación os profesores e conserxes dos centros educativos; os monitores do pavillón; os directivos, adestradores e xogadores do campo de fútbol e o persoal do Concello. "Todos os usuarios formáronse en primeiros auxilios antes de recibir os desfibriladores", indicou o rexedor.
Segundo informou Pardo Lombao, esta actuación enmárcase dentro dun programa que busca converter Outeiro de Rei nun concello cardiosaudable.
RUTA DE BICICLETAS. Os concellos de Outeiro de Rei e Castro de Rei crearán unha ruta BBT (Bicicletas Todo Terreo) de 75 quilómetros e cun trazado circular que pasa polos principais núcleos de poboación de ambos os municipios.
Segundo indicou o rexedor outeirao, a actuación conta cun orzamento de 98.800 euros, dos que a Xunta de Galicia achegará un 65 por cento a través do Fondo de Compensación Ambiental.
A ruta, que se sinalizará con paneis informativos, incorporarase á aplicación municipal Camiños de Outeiro de Rei, o que permitirá seguila mediante xeolocalización e acceder a información complementaria sobre o municipio.