O alcalde de Outeiro de Rei, José Pardo (PP), asegurou que falará co equipo de fútbol que utiliza o campo municipal para abordar a cuestión do valo na que se publicita un club de prostitución.
"Temos que falalo co equipo de fútbol, é un valo que leva varios anos colocado. Non digo nin que si nin que non, quero falar co equipo, non se se lle imos a obrigar (a quitala)", apuntou, en declaracións a Europa Press, o rexedor, preguntado acerca de que postura adoptará o Concello e se atenderá á petición do BNG de retirar esa publicidade.
De feito, atribuíu esta reclamación da formación nacionalista á proximidade coas eleccións municipais, porque "leva uns tres anos e acórdanse agora, en período preelectoral". "Non me vou pronunciar nin que si, nin que non. Nós temos autorizado pór publicidade, pero non vou tomar unha decisión sen falalo con eles", aseverou o rexedor, quen supuxo que ese valo lle proporciona "financiamento" ao equipo.
Preguntado sobre que lle parece que un equipo de fútbol teña ese valo publicitario, recoñece "que non se parou a pensar nese tipo" de cousa, e iso si, certifica que "é un club que está situado no concello".
"FINANCIAMENTO". O rexedor asegurou que lle gusta "interferir en todas as cousas" e que con iso se refería ás declaracións que o BNG denunciou como "compracentes e benévolas".
"Aquí hai un club de fútbol que buscan financiamento (para os seus gastos elevados), nós tamén lla damos. Buscan empresas de todo tipo; gustaríame máis que fose dunha gran empresa de 500 traballadores, pero aquí non a hai, ten que nutrirse do que hai", dixo.
