O misterio dos ovnis de Friol

Fai case 25 anos desde que José Manuel Castro experimentou un suposto avistamento dun ovni na leira da súa casa na parroquia de San Pedro de Vilalvite, no municipio de Friol. Foi un dos casos máis mediáticos a nivel nacional deste tipo de fenómenos e supuxo un punto de inflexión na provincia por ser a primeira vez que se falaba da presenza de extraterrestres con forma humana.

Segundo comentou este veciño friolés a este diario cando se rexistraron eses feitos, en 1996, a súa primeira reacción foi entrar en casa e coller unha lanterna para poder observar o que se presentaba ante os seus ollos ao redor da medianoite. José Manuel asegurou presenciar a chegada dunha esfera luminosa da que se baixaron cinco ou seis humanoides, das cales tres "saltaban como monos", afirmou.

Acudiu de inmediato, "asustado", a casa do seu irmán Cesáreo, que vivía moi preto del, para que corroborase o que estaba a ver alí, aínda que este non lle prestou maior importancia porque cría que se trataba de luces "de discoteca". Ao regresar á súa vivenda, José Manuel Castro continuou visualizando aquelas supostas sombras desde a fiestra da súa habitación ata que decidiu irse á cama, segundo o seu propio relato.

Unha das persoas que seguiu o fenómeno en primeira persoa, pola súa implicación no caso, foi o ufólogo Marcelino Requejo, investigadir de fenómenos ovni. "Entre os meses de xaneiro a abril de 1996 xuntamos case 400 casos en toda Galicia", explica Requejo, que asegura que o 70% das supostas aparicións tiveron lugar na provincia de Lugo.

O caso de Friol resultou ser o único no que se percibiu a presenza de humanoides. "Foi moi rechamante, non só polos seres vivos, senón porque o seu testemuño coincidía cun caso que non fora publicado nunca en xaneiro dese ano nun pobo de Asturias", sostén o ufólogo con respecto a unha familia que asegurou presenciar o mesmo fenómeno. "Viron unha esfera da que saía unha lingua en forma de rampla que se pousaba no chan", relata Requejo, que considera este último testemuño unha proba irrefutable da súa veracidade.

A pesar das coincidencias, o ufólogo afirma que a verdade está "nun mesmo" e que o 90% das persoas que acoden a el para contarlle as súas experiencias atópanse con algún caso idéntico ou similar. "O fenómeno ovni é algo inexplicable ao noso entendemento", declara Requejo. "Non hai forma segura de demostrar algo que se escapa dos razoamentos científicos", sostén.

A onda de avistamentos ovni que tivo lugar fai un cuarto de século comezou no barrio lucense de strong <>As Gándaras en 1995. "A partir dese momento era case imposible falar con toda a xente afectada porque había moitísimos casos na provincia", recorda o ufólogo, que non sabe se se trataba do mesmo obxecto ou de varios semellantes.

Segundo este experto, as experiencias paranormales non atenden a hora nin a lugar, a pesar de que a maioría se producen na estrada. "Moita xente ve unha masa de luz encima ou no lateral dos vehículos", asegura, aínda que recoñece que nalgúns casos trátase de globos meteorolóxicos ou aparellos espaciais.

Marcelino Requejo non atopa unha explicación lóxica á numerosa cantidade de avistamentos ovni de 1996 na provincia lucense. "Agora se me chegan cinco ou seis casos desde Galicia ao ano xa é bastante porque a xente non se atreve a contalo", di. Do mesmo xeito, destaca o feito de que non existe un perfil para as persoas que din ver ovnis. Dalgunha forma ou doutra, sempre existiu xente que asegura ver algún fenómeno paranormal que se escapa do alcance do raciocinio. Real ou non, o certo é que a provincia lucense ten un amplo historial en materia de avistamento de ovnis.