LUGO. O XXI Máster de Futbolín de Rábade, na súa edición con máis participación, con máis de 400 xogadores, encumbró a participantes de Barcelona, Pontevedra e Oviedo, pero varios lucenses tamén se coaron no podio. O club organizador, Bóla Meiga, resaltou o alto nivel mostrado polos inscritos e o bo ambiente que se viviu na localidade os días que se disputou este campionato, en plena Semana Santa.
Na categoría en movemento, o equipo gañador foi o formado polos pontevedreses Iago e Nino, e quedaron segundos os leoneses René e Pablo, do equipo Phaininda.
Na modalidade en parado, a parella que subiu todo o máis alto do podio foi a integrada polos barceloneses Rafa e Dani, do equipo Dolce Morte, e foron segundos Alvaro e Torino, de Lugo.
Na categoría combinada, alzouse coa vitoria o dúo formado polo barcelonés Tomás e o pontevedrés Paco, e foron segundos o lucense Iván Ares e o pontevedrés Nino. Na categoría feminina, a vitoria foi para a parella integrada por Angela e Lutxi, de Oviedo e Pontevedra, respectivamente, e o subcampeonato foi para o dúo formado pola coruñesa Paula e a lucense Alba.
Os organizadores, que contaron co apoio do Concello rabadense, a Deputación de Lugo e empresas locais, repartiron un total de 10.000 euros en premios neste torneo.
Ademais, entregáronse varios trofeos simbólicos. Así, a pontevedresa Lutxi foi nomeada a mellor xogadora e tamén houbo un recoñecemento para a barcelonesa Mireia. O mellor xogador foi o barcelonés Rafa e o mellor porteiro, o leonés René. Para rematar, o trofeo ao xogador máis regular foi para o pontevedrés Nino e premiouse á Pena O Ortegal, da Coruña, por ser o club con máis representantes nesta edición do Máster de Futbolín.
BALANCE POSITIVO. O presidente de Bóla Meiga, Lolo Candal, mostrábase o luns moi satisfeito do desenvolvemento deste torneo. Agradeceu as felicitacións recibidas dos participantes, tanto dos veteranos como dos que se estreaban este ano. «Moitos nos dixeron ao terminar que xa tiñan ganas de repetir, encantoulles ou ambiente», resaltou.
