O Concello de Guntín critica o estado "de abandono total e absoluto" da N-540 ao seu paso polo centro urbano, con grandes fochancas de ata "25 centímetros de profundidade". Quéixase de que xa informou da deterioración de viaria en varias ocasións ao Goberno central sen que de momento interveña, polo que lle urxe a que acometa ese arranxo ante as molestias que ese mal estado da estrada provoca aos veciños e a outros usuarios da mesma.
Así o denuncia a alcaldesa, María José Gómez, quen recalca que esta é unha situación que se padece "desde hai moito tempo" porque "o único que se fixo foi bachear con grava miúda que se volve levantar".
Como proba das consecuencias dese abandono da N-540, a rexedora sinala que ao pasar de forma habitual vehículos pesados por ese pavimento en mal estado xéranse vibracións que ocasionaron a aparición de gretas nunha vivenda situada nas marxes do viario.
María José Gómez fai fincapé, ademais, en que este non é un problema que afecte só aos veciños do municipio, senón que tamén lle expresaron o seu malestar por esa gran deterioración do firme outros usuarios do viario como os funcionarios de prisións do centro penal de Monterroso ou incluso docentes destinados noutras localidades como Chantada, que todos os días pasan cara aos seus centros de traballo pola travesía guntinesa.
María José Goméz reclama ao Ministerio de Transportes e Mobilidade que poña fin a esta situación "denigrante"
A alcaldesa de Guntín indica que o Executivo estatal acaba de colocar á entrada e saída da vila uns sinais que advirten de badenes "que non existen", xa que o que se atopan os condutores son esas grandes fochancas.
Sobre os trámites realizados polo Concello para esixir arranxos, sinala que xa remitiu ata tres escritos aos organismos estatais aos que lles compete e tan só obtivo por resposta o investimento global efectuada polo Goberno nese viario, sen mención expresa aos problemas que afectan o tramo guntinés.
Por iso, María José Goméz reclama ao Ministerio de Transportes e Mobilidade que poña fin a esta situación "denigrante" na principal vía do centro urbano guntinés e que execute un arranxo efectivo que acabe co problema das fochancas.
