A LITERATURA está presente, desde o xoves e durante un mes, como un ingrediente máis na cociña do mesón Colón, en Nadela. O chef do establecemento, Santi Almuiña, acaba de iniciar unhas xornadas gastronómicas nas que ofrecerá un menú inspirado nas novelas de Francisco Narla, gañador do Premio Nacional de Narrativas Históricas da editorial Edhasa.
En total, serán seis os pratos incluídos no menú destas xornadas gastronómicas, con receitas baseadas en obras deste autor que foron superventas como, por exemplo, Assur, Ronin ou a novela pola que recibiu o seu último galardón, Laín, el bastardo.
En función do argumento e os personaxes de cada novela, Santi Almuiña deseñou unha serie de pratos nos que se poden atopar múltiples sorpresas: chourizos aptos para vegetarianos, pescada invisible, un anaco de marea, atún e porco fusionados ou unhas gachas convertidas nun prato de alta cociña como sucede no caso do prato inspirado por Laín, o bastardo. Dado que a novela ten como narrador ao trobador Martín Códax, Santi Almuiña apropiouse das típicas gachas de fariña que puidese tomar o trobador no seu eterno vagar polos camiños a través dos que viaxaba a súa música e converteunas nunha reinterpretación culinaria chea de técnica e novas tendencias pero, sobre todo, repleta de sabores novos que os comensais descubrirán no comedor do Colón.
