lunes. 12.04.2021 |
El tiempo
lunes. 12.04.2021
El tiempo

A liorta de Adai en 2014 sáldase con sete condenados a dous anos de cárcere

undefined
Un momento da disputa que se montou na feira do cabalo de Adai en 2014. PEPE TEJERO (ARQUIVO)
O fiscal solicitaba 12 anos de prisión para cada un dos agresores, que atacaron ás vítimas con paus e bastóns, pero rebaixou unha década a súa petición pola demora na celebración do xuízo

Enfrontábanse a condenas de doce anos de prisión —por unha liorta a paus rexistrada na feira do cabalo de Adai—, pero tardaron sete anos en ser xulgados e a demora xogou enormemente ao seu favor. Tanto é así que a Fiscalía lucense rebaixou unha década a súa petición inicial e os sete acusados aceptaron sendas penas de dous anos de cárcere.

Os feitos sucederon na feira da parroquia de Adai, no Corgo, no mes de xullo de 2014, cando varios dos organizadores e outros asistentes foron agredidos a paus por un grupo de persoas que protestaban porque non lles deixaron apuntarse ao concurso de rodeo.

Os agresores pretendían participar no certame —que repartía varios premios en metálico relevantes—, pero chegaron tarde, cando finalizara o prazo de inscrición, e a súa reacción ante a negativa dos organizadores foi learse a golpes con eles e con todo o que se puxo por medio. No transcurso do enfrontamento, polo menos seis persoas resultaron feridas de diversa gravidade, algunhas directamente con feridas abertas na cabeza, xa que o grupo enfurecido atacou as vítimas con bastóns e paus.

Polo menos seis persoas resultaron feridas de distinta gravidade

O balbordo que se montou foi de tal calibre que moitos veciños e visitantes tiveron que refuxiarse nos establecementos de hostalería próximos para evitar verse implicados no altercado, que se prolongou durante un bo anaco.

Varias testemuñas chamaron á Garda Civil e os agresores intentaron fuxir ante a chegada dos axentes, abandonando incluso os seus cabalos no recinto. Con todo, oito deles foron identificados —case todos unidos por lazos familiares— e acabaron imputados por varios delitos de lesións.

Ante a Benemérita, a maioría deles negaron que participaran na pelexa, aínda que si recoñecían que se produciu unha liorta cando a organización da feira lles impediu inscribirse no concurso de rodeo e tratou de que abandonasen o recinto onde se ía a celebrar a proba. Varios dos imputados insistiron entón en que non tomaran parte na pelexa a paus e declararon ademais que non recordaban nada porque estaban bastante bébedos nese momento.

PENAS. Finalmente, o ministerio fiscal acusou oito persoas de cometer catro delitos de lesións e dúas faltas do mesmo tipo, aínda que por estas últimas non solicitou pena ninguna, xa que foron derrogadas penalmente coa entrada en vigor da reforma de 2015. Por cada un dos catro delitos de lesións, o ministerio fiscal solicitou inicialmente tres anos de cárcere, polo que cada un dos acusados se enfrontaba a unha pena de doce anos de prisión. Dábase a circunstancia de que a solicitude de pena por parte do ministerio público era incluso superior á solicitada por un dos agredidos, que pedía cinco anos de prisión.

A vista oral por este caso íase celebrar este mércores no Penal número 2 de Lugo, pero as partes chegaron a un acordo de conformidade e xa non foi necesario escoitar os testemuños dos implicados. O ministerio fiscal retirou a acusación para un dos imputados e recoñeceu que concorría neste caso a atenuante de dilacións indebidas —ao transcorrer case sete anos desde que sucederon os feitos—, polo que rebaixou a petición para os demais de doce a dous anos de prisión.

A Fiscalía de Lugo reclamaba tamén que os acusados pagasen solidariamente máis de 5.000 euros por diversos conceptos, como as lesións, as secuelas e os gastos de asistencia médica. Finalmente, os sete acusados aceptaron indemnizar unha das vítimas na cantidade de 1.200 euros polas feridas que lle provocaron e a outra en 1.500 euros polas lesións e tamén polas lentes que lle romperon durante a pelexa. Os agresores —que tamén terán que indemnizar o Servizo Galego de Saúde polo tratamento médico dispensado aos feridos— comprometéronse a pagar as indemnizacións en dez prazos.

A liorta de Adai en 2014 sáldase con sete condenados a dous anos de...