Unha leira da parroquia guntinesa de Vilameá rexistrou en tres semanas dous sucesos similares: dous vehículos roubados en Carballo e Melide apareceron calcinados na zona, que se empraza preto dunha saída da autovía A-54. A Garda Civil ten aberta unha investigación, pois ambos os sucesos poderían estar conectados.
Un dos vehículos é o camión que apareceu carbonizado o pasado domingo e pertencía a unha empresa de pneumáticos carballesa. O roubo produciuse previsiblemente na madrugada do sábado e o propietario da firma cifra as perdas nuns 7.000 euros.
"Démonos conta do sucedido ou domingo pola mañá ao abrir ou negocio. Foi unha desagradable sorpresa e moito peor cando nos chamou a Garda Civil para avisarnos de que o atoparan completamente queimado en Guntín", explica o dono, quen cifra o valor do vehículo nuns 4.500 euros e precisa que no seu interior había catro transpaletas e dous transformadores dun particular valorados noutros 2.500 euros.
O vehículo pesado era da marca Ibeco, contaba con 20 anos de antigüidade e atopábase nunha parcela do polígono industrial de Carballo. "Os ladróns saltaron o muro, forzaron a cancela e marcharon co camión", relata o dono da empresa, quen se mostrou sorprendido de que o vehículo aparecese a máis de 100 quilómetros do seu lugar de orixe e completamente calcinado.
A empresa de pneumáticos propietaria do camión cifra as perdas en 7.000 euros. Dentro había 4 transpaletas e 2 transformadores
Desde a empresa barallan dúas hipóteses sobre o sucedido: que os ladróns usaron o camión para cometer algún delito "e logo prendéronlle lume para borrar todas as probas"; ou ben que os amigos do alleo pretendían roubar as transpaletas do interior "e como son tan pesadas decidiron marchar co camión directamente", indican, á vez que remarcan que esta maquinaria non apareceu calcinada. No entanto, móstranse cautelosos e sinalan que a investigación aínda está aberta.
O propietario da firma indicou que nos máis de 50 anos cos que conta o negocio nunca viviron un suceso similar. "Dá moita rabia porque levamos toda a vida traballando para que veñan uns decoñecidos a facer mal no noso traballo", indica. O dono precisou que adquiriu o vehículo pesado hai catro anos e tiñan previsto facerlle unha reforma proximamente. "Por desgraza agora xa non será necesario", lamenta o home.
MELICE. O outro roubo produciuse a finais de xullo nun desguace de Melide. Os ladróns levaron un turismo que estaba á venda, un Seat León FR, que apareceu catro días despois totalmente carbonizado na mesma leira guntinesa. Os donos do establecemento sinalaron no seu momento que os ladróns intentaron tamén, sen éxito, levar outro coche de características similares que apareceu coas fechaduras rebentadas.
Os propietarios do negocio cifraron as perdas en máis de 6.000 euros. O suceso tamén está a ser investigado pola Garda Civil.
