Nos primeiros nove meses do presente exercicio, a Xunta realizou investimentos en Friol por valor de 7,5 millóns. O presidente do Goberno galego, Alberto Núñez Feijóo, e o alcalde de Friol, José Ángel Santos, mantiveron recentemente un encontro no que ambos analizaron algunhas das actuacións realizadas no municipio.
Entre todas elas, Feijóo valorou a finalización da obra do novo albergue de peregrinos, que supuxo un investimento por parte de Turismo de 285.000 euros e que, segundo o presidente da Xunta, repercutirá positivamente na actividade económica da zona.
José Ángel Santos tamén trasladou ao máximo mandatario galego o seu agradecemento por outros investimentos, como a rehabilitación do centro social, a cuxo proxecto a Xunta destinou outros 400.000 euros.
A "estreita colaboración" que, segundo Ángel Santos, manteñen a Xunta e o Concello permitirá materializar proximamente outros proxectos no municipio, como é o caso da traída de auga que fornecerá á totalidade dos veciños da parroquia de Prado.
Ambos os mandatarios tamén analizaron o estado no que se atopa o proxecto para mellora a estrada autonómica que une as capitais municipais de Friol con Palas de Rei.
Feijóo destacou que a redacción do proxecto xa está en marcha e que as súas previsións son que o documento estea listo nas próximas semanas. Unha vez que se complete este trámite, a intención da Xunta é iniciar de forma "inminente" a expropiación dos terreos.
A execución da obra de mellora desta estrada suporá para o Goberno autonómico un investimento duns seis millóns de euros.
Servizos sociais. Feijóo e Santos tamén coincidiron en sinalar a necesidade de que a Administración galega e o local sigan colaborando en materia de servizos sociais, co obxectivo "non só de manter senon tamén aumentar" os recursos destinados a esta área, "coa finalidade de que os veciños de Friol poidan seguir tendo un nivel de vida digno".
Ambos os mandatarios tamén mostraron o seu compromiso a seguir traballando "de forma estreita" en futuros proxectos que impliquen maior benestar para todos os frioleses.
