A Demarcación de Estradas do Estado en Galicia convoca e somete a información pública o levantamento de actas previas para a ocupación de terreos co fin de construír unha glorieta na Nacional-VI, en Outeiro de Rei, segundo publicou este xoves o Boletín Oficial do Estado.
As expropiacións son o paso previo ao comezo das obras e dan continuidade a outros trámites xa aprobados polo Ministerio de Transportes e Mobilidade, como o expediente de información pública e o proxecto de trazado e a construción desta glorieta en quilómetro 513,670 da Nacional-VI. Os traballos teñen un orzamento estimado de 365.472 euros.
Esta intersección soporta un intenso tráfico, xa que serve de entrada e saída de Outeiro de Rei para acceder á A-6. Tamén conflúe alí a avenida Terra Chá, unha vía urbana con diversos servizos e equipamentos, e a estrada autonómica LU-115. Neste lugar hai un carril central de acceso co fin virar á esquerda para acceder a este viario, que vai a Castro de Rei, desde a Nacional-VI.
O alcalde de Outeiro de Rei, José Pardo, precisou que a construción desta rotonda "é unha vella reivindicación para mellorar a seguridade viaria neste punto para vehículos e peóns, así como para axustar a velocidade media do tráfico na travesía da capitalidade municipal". O proxecto prevé a modificación do paso de peóns na LU-115 co fin de evitar retencións na glorieta.
A relación de afectados as expropiacións exporase no taboleiro de anuncios do Concello, na Unidade de Estradas do Estado en Lugo, situada na Rolda da Muralla, e na Demarcación de Estradas na Coruña, na rúa Antonio Machado. Os expropiados están citados para o día 3 de xuño na casa consistorial de Outeiro de Rei.
