Un cidadán romanés perdeu este domingo a vida afogado ao caer ao río Miño cando pescaba na parroquia de Francos, en Guntín, moi preto xa de Portomarín.
Á zona desprazáronse efectivos do GES de Monterroso, bombeiros do parque comarcal de Chantada, a Garda Civil e a embarcación de Protección Civil de Portomarín, que finalmente logrou localizar o corpo da vítima a dez metros do lugar onde caera.
O operativo logrou rescatar o cadáver do home, duns sesenta anos, e que se atopaba pescando, acompañado polos seus amigos e compatriotas. Ao parecer, foi un esvarón nun descoido o que provocou que se precipitase á auga, nunha zona onde o río presenta numerosas pedras e unha profundidade considerable.
Os seus acompañantes deron a alerta sobre as 20.00 horas, e ás 21.15 o seu corpo xa se rescataba, lamentablemente sen vida.