Guntín ten un Punto de Atención á Infancia (PAI) de luxo, que non só están chamadas a ser unha referencia para as familias do municipio, senón doutros próximos que tamén poden inscribir aos seus fillos, tal como destacan desde o Concello.
Este centro, cuxa construción fixo realidade unha vella aspiración veciñal, abriuse en febreiro, pero tivo que pechar ao mes seguinte a causa do estado de alarma. Volveu abrir en setembro, coa presenza inicial de tres alumnos de 0 a 3 anos, pero a súa capacidade é de vinte prazas.
"Os distintos espazos e a ausencia de masificación fai que o noso PAI sexa un lugar axeitado para ter os nenos coa maior seguridade posible nestes tempos de pandemia, sexan ou non familias residentes non concello", explica a alcaldesa, María José Gómez.
Este centro educativo, que funciona de luns a venres de 08.00 a 16.00 horas, ten unhas instalacións modernas, amplas e ben equipadas, deseñadas para atender con seguridade aos nenos e con iluminación e ventilación natural en todas as aulas.
A inmoble conta cunha sala de usos múltiples para efectuar exercicios de psicomotricidade e diferentes actividades propostas polas educadoras, unha sala de berces para o descanso dos nenos, unha aula común para os alumnos de 0 a 3 anos, unha sala de gateo para que os nenos dean os primeiros pasos e amplo patio exterior. As instalacións complétanse cun despacho de dirección, unha cociña e dous aseos.
O PAI conta cunha técnica directora, Noelia Prado Barrio, e unha coidadora. Prado resalta que o centro está equipado "cos mellores materiais educativos e cunha gama de recursos lúdicos adaptados ás diferentes idades". Para matricularse hai que chamar ao teléfono 982.32.00.10 ou ao do PAI, que é o 699.83.52.87.
