Máis de 600 alumnos de catro colexios lucenses asistiron este luns no circuíto de karts de Outeiro de Rei a unha exhibición da Garda Civil. Participaron nenos de entre 3 e 13 anos do Ceip Laverde Ruíz de Outeiro de Rei; do IES Río Miño e do Ceip Otero Pedrayo de Rábade, e do colexio Luís Pimentel de Lugo.
Os axentes ensinaron aos escolares os medios humanos e materiais cos que traballan. Así, os nenos puideron ver e manipular todo tipo de elementos como aparellos para medir a alcoholemia, ferramentas ou armas de xoguete.
Os participantes subíronse nos distintos vehículos pertencentes á Agrupación de Tráfico, ao Servizo de Protección da Natureza e a Seguridade Cidadá. O acto contou ademais coa participación de cans adestrados que chamaron especialmente a atención dos máis pequenos.
Membros da Garda Civil explicaron ademais o funcionamento e actividades que desenvolve cada unha das distintas especialidades da Benemérita.
PLAN PARA A CONVIVENCIA. Este acto, que contou coa presenza da subdelegada do Goberno en Lugo, Isabel Rodríguez, enmárcase no Plan para a Convivencia impulsada por Garda Civil e Policía Nacional nos centros educativos para formar escolares en temas de especial interese para o colectivo como poden o acoso escolar, os riscos das redes sociais ou a violencia de xénero.Rodríguez puxo en valor esta iniciativa, a primeira que se realiza este curso en Lugo, e destacou "o labor das forzas de seguridade na protección da infancia". Agradeceu ademais aos axentes a súa implicación "para facer posible cada curso a celebración de numerosas iniciativas nos centros lucenses".