Friol incrementa a súa oferta de aloxamentos turísticos coa apertura do hotel cultural Casa da Galbana, un novo establecemento que se sitúa en pleno centro urbano da localidade, concretamente na Praza Andón Cebreiro.
Este novo negocio é froito do espírito emprendedor de María Remedios Otero e os seus fillos Carlos e Marta Arias Otero, quen lograron materializar unha idea coa que pretenden estimular a comarca desde o punto de vista turístico, económico e cultural.
Para conseguir este triplo obxectivo, os impulsores da iniciativa decidiron acometer unha profunda reforma da coñecida como Casa da Galbana, un edificio histórico de Friol, no que se logrou preservar a arquitectura tradicional coa funcionalidade duns espazos deseñados para conseguir o máximo confort de hóspedes e visitantes.
Cunha superficie duns 470 metros cadrados, este novo hotel dispón de dúas áreas claramente diferenciadas, que están separadas entre si por un patio interior. A primeira delas é a parte de aloxamento, para o que dispón de sete habitacións, e a segunda é un espazo multidisciplinar para a organización de conferencias, talleres especializados, exposicións ou eventos musicais. E é que os promotores deste novo hotel pretenden desenvolver un papel moi activo no impulso de todo tipo de eventos culturais, co obxectivo de lograr un plus de diferenciación con relación a outros establecementos e contribuír tamén á dinamización do municipio.
O investimento destinado para poder pór en marcha este proxecto ascendeu a un total de 525.945 euros, dos que 196.731 correspóndense cunha subvención concedida por Agader, organismo dependente da Consellería de Medio Rural.
PORTAS ABERTAS. O hotel cultural Casa da Gabana celebrou este luns unha xornada de portas abertas, á que asistiron, entre outras personalidades, o delegado territorial da Xunta en Lugo, Javier Arias, e o alcalde friolés e presidente do GDR Comarca de Lugo, José Ángel Santos. Ambos destacaron esta aposta por dinamizar "o rural" cun proxecto que servirá tamén para crear catro novos postos de traballo.
