O centro colaborativo de Friol é xa unha realidade. Inaugurado este martes polo alcalde, José Ángel Santos
O proxecto, iniciado a mediados do ano pasado, contou cun investimento de 295.000 euros -dos cales 160.000 proveñen do Agader a través dunha subvención ao GDR Comarca de Lugo- e levará o nome de Celestino Fernández de la Vega. Na súa honra descubriuse unha placa na xornada inaugural, momento que contou coa presenza do fillo do escritor e intelectual friolés xa desaparecido.
Para a construción deste centro tivo que ser demolido o antigo Punto de Atención á Infancia. No seu mesma localización, erixíronse estas instalacións que contan cunha superficie útil de 160 metros cadrados, dunha soa planta e con dúas zonas independentes, unha para formación e outra para usos xerais.
O proxecto ten como obxectivo fundamental pór a disposición dos veciños, tanto particulares como asociacións, emprendedores, entidades de economía social e o propio Concello, un espazo adaptado ás necesidades actuais para a prestación de servizos económicos e formativos.
"A aposta polo rural en Friol xa é unha realidade, e non unha necesidade"
Para iniciar as actividades, neste centro xa se atopa instalada unha aula de formación e de informática, para dar acceso a un programa de formación en liña non regulada, flexible e con tutorización personalizada. Con isto, o Concello busca ampliar as competencias persoais e profesionais de persoas adultas.
PROXECTOS. As instalacións acollerán distintas actuacións que xa están en marcha, como un programa de economía social para dar apoio e fomentar o traballo que levan a cabo as entidades que asumen este tipo de economía no municipio. Outra das iniciativas que pronto se materializarán será a do asesoramento a pequenas e medianas empresas en materias relacionadas coas necesidades xurdidas ao fío do escenario socioeconómico vivido tras a pandemia.
O rexedor, o popular José Ángel Santos, indicou que "a partir de agora con máis forza seguiremos incrementando e poñendo a disposición da nosa veciñanza proxectos de índole económica, social, formativa e todos aqueles que poidan axudar ao noso tecido produtivo. Poñeremos á súa disposición lugares de reunión, e coidaremos a economía social como motor da fixación da poboación non noso municipio". "A aposta polo rural en Friol xa é unha realidade, e non unha necesidade", engadiu o alcalde friolés.
Pola súa banda, Javier Arias resaltou que a Administración autonómica distribuirá 7,3 millóns de euros entre os 24 GDR galegos.