Unha persoa resultou ferida de gravidade en Castroverde ao redor das 22.15 horas deste xoves nun accidente no que se viron involucrados dous vehículos. O sinistro produciuse pola colisión lateral entre un todoterreo e un turismo, que levou a peor parte, pois o impacto produciuse na porta do condutor.
Este tivo que ser excarcerado e sufriu feridas de consideración. Estaba consciente, pero queixábase da zona torácica e do peito, polo que foi evacuado ao Hula.
Pola súa banda, o condutor do outro vehículo saíu ileso.
O choque produciuse no municipio de Castroverde, na estrada LU-530 que une Lugo coa Fonsagrada.
Ao lugar desprazáronse dúas ambulancias do 061, dúas patrullas da Garda Civil, bombeiros de Sarria e o GES de Becerreá, cuxos compoñentes se encargaron da excarceración do ferido.
