A XXIV Feira do Cabalo de Adai (O Corgo) volveu cumprir coas expectativas e reuniu no recinto feiral uns 250 cabalos nunha animada xornada que se desenvolveu sen incidencias.
A choiva que caeu á primeira hora da mañá fixo que a afluencia de animais baixase sensiblemente con relación á rexistrada noutras edicións, aínda que a calidade dos exemplares volveu alcanzar un elevado nivel.
Proba diso foron as boas puntuacións alcanzadas polo medio centenar de cabalos que participou no concurso morfolóxico, certame puntuable para a Copa de Galicia de Pura Raza Galega.
O certame, organizado polo Concello do Corgo en colaboración coa Asociación Cabaleiros da Feira de Adai e a Asociación Pura Raza Galega, incluíu tamén outras actividades paralelas, como
Pero, sen dúbida, un dos momentos máis aplaudidos polo público que se deu cita no recinto de Adai foi a actuación da amazona alemá Corinna Sonja, quen realizou un espectacular número de ximnasia acrobática a cabalo.
O presidente da Asociación Pura Raza Galega, Xacobo Pérez Paz, tamén destacou o feito de que toda a xornada desenvolver con absoluta "normalidade e sen ningún tipo de accidente".
CONCURSO. No concurso morfolóxico de cabalos de Pura Raza Galega, o gañador na categoría de sementais foi Jalisco, de Marcelino Freire (Oza-Cesuras) e que empatou a 71 puntos co segundo clasificado, Canteiro de Esteiro, de Antonio Grela (Cerceda). O desempate entre ambos os exemplares realizouse en base á puntuación que ambos obtiveron na rexión da cabeza, impoñéndose Jalisco por medio punto.
Na categoría de eguas de máis de tres anos, a gañadora foi Dana, de Marcelino Freire, e o segundo posto foi para Leixa, de José Fandiño (Ferrol).
En cabalos cruzados, os dous primeiros postos foron por esta orde para Makelele, de Nicolas Arnoso, e Suevo, pertencente á gandería de Miguel González Aldegunde, do Corgo.
No apartado de eguas cruzadas, o primeiro posto foi para Alba, da gandería monterrosina Dos Hermanos, e o segundo, para Leixa, de Héctor Domínguez (Padrón).