Un veciño da localidade lucense de Rábade, de 44 anos de idade, enfróntase a unha posible pena de dez anos de cárcere por asfixiar ata a morte ao seu irmán, de 45 e cunha discapacidade recoñecida do 65%, no domicilio que ambos compartían.
Segundo o escrito de acusación do ministerio fiscal, os feitos sucederon o día 23 de novembro de 2019, cando o acusado, con ánimo "de pór fin á vida do seu irmán" apertoulle o pescozo ata causarlle a morte", que se produciu por asfixia "mecánica por compresión".
Posteriormente, chamou por teléfono á Garda Civil para informar do que fixera.
Segundo o fiscal, "o acusado tiña facultades para comprender os seus actos e a vontade para decidirse a executalos intactas ao momento dos feitos, sendo plenamente consciente que coa súa acción acabaría coa vida do seu irmán".
O procesado atópase en prisión preventiva desde o 25 de novembro de 2019.
A vista oral celebrarase o vindeiro venres -día 2 de xuño- na Audiencia Provincial de Lugo e o ministerio fiscal, que acusa ao procesado dun delito de homicidio coa circunstancia agravante de parentesco, pide para o acusado dez anos de cárcere.
Así mesmo, reclama unha indemnización de 21.000 euros para outro dos seus irmáns, mentres que o pai de ambos renunciou a presentar reclamación algunha.
