LUGO. O propietario de Mobles Toirán, M.V.V., enfróntase a unha condena de tres anos de prisión por un delito de incendio en bens propios, xa que a Fiscalía lucense considera probado que foi o autor do lume que calcinou a súa empresa fai xa máis de oito anos. O xulgado do Penal número 2 de Lugo citou onte ás partes para ofrecerlles a posibilidade de alcanzar un pacto de conformidade, pero non houbo acordo, polo que se celebrará o xuízo para determinar a súa responsabilidade nos feitos.
O voraz incendio iniciouse sobre as sete e media da mañá do 21 de abril de 2010. Ese día, segundo os argumentos do fiscal, o acusado acudiu á nave onde tiña o seu negocio de exposición e venda de mobles -sita na recta de Sabarei (O Corgo)- e cortou desde dentro do recinto a liña telefónica que conectaba a nave coa central de alarmas.
Acto seguido, «a fin de simular unha intrusión», prendeu lume e asperxeu as instalacións con líquido acelerador da combustión «coa intención de que o lume se propagase por toda a nave e as súas dependencias.
O acusado pretendía así «beneficiarse ilicitamente da cobertura da póliza contratada catro meses antes coa compañía aseguradora, que cubría o risco de incendio sobre o continente, por importe de 700.000 euros, e sobre o contido, por importe de 900.000 euros». O fiscal explica con todo no seu escrito que «non consta na causa que o acusado realizase reclamación algunha á compañía aseguradora».
EXTINCIÓN. O lume estendeuse «rapidamente e con gran intensidade», polo que a nave e todo o seu contido quedaron completamente destruídos. Finalmente, as chamas foron sufocadas sobre as once e media da mañá polos membros do equipo de extinción dos bombeiros de Lugo e do Concello do Corgo. Os efectivos tiveron que empregarse a fondo e centráronse sobre todo no almacén traseiro, onde había un depósito con máis de mil litros de combustible da calefacción.
O incendio foi de tal intensidade que resultou necesario cortar a estrada LU-546, que une Lugo e Sarria, durante máis dunha hora. Ata a zona tamén se desprazaron medios de limpeza e de mantemento de estrada.
Tras o suceso, os primeiros indicios xa fixeron crer aos investigadores que o lume se orixinou por unha chama directa desde o interior das instalacións e que fora provocado de forma intencionada. Finalmente, as pescudas sinalaron ao propietario da nave, M.V.V., como presunto autor do lume, polo que foi acusado dun delito de incendio en bens propios.
Ademais da pena de tres anos de cárcere, o ministerio público solicita que o acusado indemnice aos concellos de Lugo e O Corgo «na cantidade que se determine en execución de sentenza» polos gastos da extinción do incendio, máis os intereses legais desde entón.
