A Deputación Provincial acomete estes días traballos de mellora en dúas das principais vías de comunicación do municipio de Castroverde. Trátase concretamente das estradas LU-P-1611, que une o centro do centro urbano coa N-VI en Gomeán (O Corgo), e a LU-P-1201 que dá acceso ao polígono empresarial. Para executar estes traballos, o organismo provincial realizou un investimento de case 600.000 euros.
O presidente da Deputación, Darío Campos, supervisou este martes o estado destes traballos, en compañía do alcalde de Castroverde, José María Arias, e o portavoz do goberno provincial, Álvaro Santos.
Campos destacou a importancia da LU-P-1611, por ser unha vía que discorre entre a LU-530 e a N-VI, ao seu paso por Gomeán, no municipio do Corgo. Neste trazado actuouse no tramo comprendido entre os puntos quilométricos 118,7 ao 120,8 e do 121,4 ao 124,3. Os traballos, que xa están finalizados, consistiron nunha mellora integral do firme da calzada e a sinalización. Para esta actuación destináronse un total de 253.700 euros.
Polo que respecta á LU-P-1201, que conecta co polígono industrial, a actuación aínda está en marcha e suporá un investimento de 350.000 euros. Nesta vía trabállase nun tramo de 2,2 quilómetros de lonxitude, entre os núcleos de Souto de Torres a Sobrado. Ademais dos beneficios que esta actuación suporá para os veciños da zona, o presidente da Deputación tamén sinalou que con esta mellora desta vía que dá acceso ao polígono "confiamos en facilitar que máis empresas se interesen por asentarse neste enclave para emprender novos proxectos e xerar empregos".
O alcalde de Castroverde agradeceu, pola súa banda, o investimento realizado pola Deputación "nas dúas vías máis importantes do concello".
Arias recoñeceu que a reunión tamén serviu para tratar de modo informal o tema da residencia e destacou "a boa disposición" do equipo de goberno provincial para ceder canto antes ao Concello esta instalación.
