Ciudadanos expón un proxecto "de futuro" para Outeiro de Rei, cunha xestión máis eficaz dos recursos, para acabar así co actual modelo de traballo municipal "de mínimos". O seu coordinador local, Manuel Varela Trigo, cre que a "nova política", coa "claridade" e a "transparencia" como emblemas, sacará máis partido ao potencial do concello.
Así o defendeu este martes á noite Varela no acto de presentación desta nova agrupación de Cs, celebrado no restaurante González, en San Martiño de Guillar. Estivo arroupado, entre outros, por Olga Louzao, portavoz da formación no Concello de Lugo, e Laureano Bermejo, secretario de organización de Ciudadanos Galicia.
Para Manuel Varela, o orzamento de máis de seis millóns de euros do que dispón o goberno local, do PP, debería servir para dotar de mellores servizos aos veciños, pero cre que falla a forma de xestionar eses recursos.
Puxo de exemplo desa falta de planificación as obras no colexio, que se están executando co curso en marcha, ou as deficiencias en redes como a da auga e saneamento. Tamén cre necesarias máis políticas de emprego.
Varela animou a sumarse a este novo proxecto político en Outeiro de Rei. "Buscamos o talento da xente", recalcou. Incidiu en que os veciños están cansados do actual clima político no municipio, sen ningún entendemento entre goberno e oposición. Nesa liña, destacou que Cs non pactará cos partidos, senón "coas ideas".
Na agrupación local, que está a sondar porta por porta as demandas veciñais para levalas ao seu programa electoral, tamén están Jesús Teijeiro Iglesias, como responsable de redes sociais, e Paula Varela Núñez, como responsable de cidadanía.
