O candidato do Partido Popular, Felipe Labrada Reija, será finalmente o novo alcalde do Corgo, despois do acordo ao que chegou con Ciudadnos (C's), cuxo cabeza de lista, Javier Vila, será o primeiro tenente de alcalde da corporación municipal e edil delegado de Vías e Obras.
O Partido Popular foi a forza máis votada nas pasadas eleccións municipais, nas que conseguiu cinco concelleiros, pero quedou a un da maioría absoluta, polo que necesitaba un pacto para investir alcalde ao seu candidato, que se presentou por primeira vez, logo da retirada de José Antonio Ferreiro.
O acordo con Ciudadanos, que ten dous edís na corporación, garántelle ao novo alcalde un goberno con maioría absoluta no pleno, dado que o BNG ten un concelleiro e o Partido Socialista tres.
Fontes de ambos os partidos confirmaron que o acordo para formar o goberno bipartito xa foi rubricado na xornada do xoves.
