A Garda Civil puxo en marcha unha investigación para tratar de identificar ás oito persoas que o pasado domingo agrediron a outras catro por unha suposta vinganza nas inmediacións da piscina municipal do Corgo, dado que uns días antes non lles permitiron o acceso á área recreativa coa desculpa de que o aforamento estaba cuberto, pero de momento non se produciu ningunha detención.
Fontes da propia Benemérita informaron a Efe de que os axentes encargados do caso continúan coas pescudas para identificar aos responsables desa pelexa, pero polo menos de momento, ningún dos responsables da mesma foron detidos.
SEGURIDADE PRIVADA. O alcalde do Corgo, José Antonio Ferreiro, confirmou, pola súa banda, que o próximo día 15 pechará a piscina municipal por esta tempada, de modo que a decisión de contratar seguridade privada no recinto de lecer para evitar que se reproduzan situacións deste tipo quedará aprazada ata o próximo ano.
Ferreiro dixo tamén a Efe que o goberno local analizará "fríamente" o sucedido para garantir en diante a seguridade na piscina municipal, porque a súa única preocupación "é que as instalacións sigan funcionando normalmente".
SUCESO. Os feitos ocorreron ao redor das sete da tarde, cando oito persoas se presentaron na terraza do bar que está situado á beira da área recreativa do río Chamoso, onde está emprazada tamén a nova piscina municipal do Corgo, e comezaron a increpar ás persoas que estaban alí.
A actitude dos supostos agresores desencadeou unha pelexa, na que os responsables do altercado usaron paus para golpear ás vítimas, catro persoas en total, entre elas o propietario do local de hostalería.
Todos eles recibiron asistencia sanitaria no HULA, aínda que ningún dos feridos -con idades comprendidas entre 36 e 52 anos- resultou lesionado de gravidade.
