O contaxio do primeiro tenente de Portomarín, Pablo Rivas, obrigou a suspender a sesión plenaria que ía celebrar a corporación esta semana. O concelleiro está confinado na súa casa e presenta síntomas leves.
Por mor de detectarse o caso, na mañá do pasado mércores, tanto o alcalde, Juan Serrano, como persoal municipal se someteron ás preceptivas probas PCR como posibles contactos directos. Serrano consultou coa secretaria municipal, que decretou o adiamento da convocatoria plenaria por precaución.
A última hora da tarde deste venres comezaron a chegar os resultados das probas e todos os que se coñecen son negativos, segundo fontes municipais, polo que a posibilidade dun brote entre os edís e o persoal do Concello parece que está descartada.
Antes de dar o seu positivo, Pablo Rivas non estivo en contacto directo con outros concelleiros, nin do seu partido, nin da oposición. Nos días previos si coincidiu nun acto co alcalde e con outra persoa allea ao Concello, que están sans.
Juan Serrano xa está vacinado e, ao dar negativo o seu PCR, queda descartado que sexa transmisor do virus e pode desenvolver a súa actividade con normalidade, sen manter a corentena. "Tomamos todas as medidas de seguridade ao noso alcance para controlar a situación. Tratamos de ser ou máis precavidos posible", comentou o rexedor. De feito, unha parte dos posibles contactos de Pablo Rivas fixeron a proba de antígenos, sen que se descubrisen contagios, de forma previa á PCR oficial.
