O Ministerio do Interior concedeu a Cruz da Orde do Mérito da Garda Civil, con distintivo branco, aos catro axentes que o pasado 28 de outubro de 2019 lograron rescatar a unha parella de octoxenarios que se quedou atrapada polas chamas na súa casa situada no núcleo friolés de Cima de Vila.
Ao redor da unha e media da madrugada daquela fatídica noite, o matrimonio formado por Mari e Daniel viuse sorprendido por un voraz incendio que acabou por calcinar completamente a súa casa. A anciá -que faleceu por causas naturais meses máis tarde- lograra levar ao seu marido, con problemas de mobilidade, ata a terraza do inmoble. Unha vez alí víronse rodeados polas chamas e sen a posibilidade de poder pedir auxilio, xa que o teléfono caéraselles ao chan a causa do nerviosismo.
Cunado a súa única alternativa para escapar do lume era lanzarse ao baleiro desde unha altura de seis metros, a casualidade fixo que a parella de axentes formada por Afonso José Varela e José Ángel Igrexas, do posto de Friol, estivesen de patrulla pola zona.
Os axentes pediron reforzos de inmediato e pronto chegaron ao lugar o por entón sarxento de Castro -actualmente destinado en Burela- Manuel Luís Sánchez, e o axente do posto de Guitiriz, José Manuel Loureiro, quen atopábase fóra de servizo. Entre todos lograron salvar aos anciáns non sen moitas dificultades, aínda que finalmente ninguén resultou ferido.
O suceso reforzou os vínculos de amizade dos catro axentes, que se mostran moi agradecidos por este recoñecemento.
