A XXIII Feira do Cabalo de Adai, no Corgo, cumpriu un ano máis as expectativas, a pesar de ver reducida a súa afluencia por mor das celebracións de San Xoán. No recinto feiral congregáronse uns 350 cabalos, dos cales 50 participaron nos concursos morfolóxicos e lograron manter o nivel de calidade de anos anteriores, segundo os organizadores.
Os 350 animais congregados este domingo en Adai recibiron coidados durante toda a xornada para que puidesen soportar sen excesivo padecemento as elevadas temperaturas que se rexistraron no día de onte. Reserváronse para eles amarres de seguridade á sombra e fornecéuselles auga abundante.
Tamén tiveron que tomar precaucións as persoas que acudiron a presenciar tanto os concursos morfolóxicos como a exhibición de doma, pois durante todo o día foi necesario evitar a exposición prolongada ao sol e soportar temperaturas próximas aos 40 graos.
O certame, organizado polo Concello do Corgo en colaboración coa Asociación Cabaleiros da Feira de Adai e a Asociación Pura Raza Galega, logrou, no entanto, cumprir as previsións e deixou bo sabor de boca, pois todo o programa desenvolveuse con normalidade e sen incidencia algunha.
Nos concursos morfolóxicos participaron 50 cabalos procedentes de distintos puntos de Galicia.
PREMIADOS. No certame de cabalos de Pura Raza Galega, puntuable para a Copa Galicia, quedou primeiro Jalisco, de Marcelino Freire (Oza-Cesuras); o segundo foi Caramuxo, de José Fandiño Vázquez (Ferrol); o terceiro posto foi para Castiñeiro III, de Gandería Fontenla (A Estrada), e o cuarto foi Comanche, de José María Costa Blanco (Muras).
Na categoría de eguas o primeiro e o terceiro posto foron para Támaga e Dana, ambas de Marcelino Freire; en segundo lugar quedou Leixa, de José Fandiño, e a cuarta foi Shakira, de Fontenla.
En cabalos cruzados, os premios, por esta orde, foron para Lis, de Ramón Fernández Rielo; Alpi, de Ángel Núñez Torrón; Altanero, de Gonzálo Yáñez, e Lixeiro, de Roberto García Fernández.
No apartado de eguas, a primeira foi Xara, de Manuel Rosende (Teo); a segunda, Alba, de Dos Hermanos (Monterroso); a terceira, Marquesa, de Martín Ortigueira (Teo), e a cuarta, Ballin Down, de Gonzalo Yáñez (Lugo).