O Concello de Rábade negocia a compra duns terreos para a construción dunha gran zona verde na Avenida de Vilalba, fronte á igrexa parroquial. Se os contactos cos propietarios frutifican, ese espazo, que pretende dotar dun parque infantil e doutro biosaludable, tamén tería saída cara ás rúas Gabriela Neto e San Vicente.
O alcalde, o independente Francisco Fernández Montes, explica que no anterior mandato xa intentou adquirir para ese fin un solar situado xusto á beira da igrexa, pero ao non chegar a un acordo cos donos o goberno que lidera interesouse por outra parcela situada xusto enfronte do templo, sen edificar, que ten unha superficie duns 1.600 metros cadrados. O rexedor asegura que as conversacións van por bo camiño e espera chegar a un acordo económico cos propietarios.
Montes defende que, polo seu emprazamento, o solar ofrece aínda máis posibilidades que o anterior. Nese sentido, recalca que se ao final hai un acordo para a compra desa leira, trataría de adquirir outra anexa, de 900 metros cadrados e doutro propietario, co que a zona verde resultante sería máis ampla e, ademais, poderíase acceder tamén á mesma desde dúas rúas perpendiculares á Avenida de Vilalba -Gabriela Neto e San Vicente-.
CO PLAN ÚNICO. O alcalde, que non concretou o investimento que será necesaria para a compra e adecuación dos terreos, se adiantou que a súa intención é pechar canto antes esa operación e incluír estas obras entre as actuacións que o Concello financiará con cargo á próxima anualidade do plan único da Deputación.
"Queremos crear un gran pulmón verde nunha zona que ata agora carece dunha dotación dese tipo, e buscamos que sexa unha zona de descanso para veciños de todas as idades", resalta Fernández Montes sobre este proxecto.
