O Concello de Friol está disposto a loitar de forma decidida contra a caída da natalidade no municipio. Para tratar de reverter esta caída demográfica, o alcalde da localidade, o popular José Ángel Santos, anunciou que nos orzamentos do ano 2020 incluirá un novo paquete de axudas á natalidade, que incluirá unha axuda directa de 1.000 euros por cada novo nacemento ou adopción e un lote de produtos de primeira necesidade para o recentemente nado, valorado en 200 euros.
Estas novas axudas supoñen, na práctica, duplicar as que estaban vigor este ano e das que se beneficiaron unhas doce familias do municipio. Precisamente, estes bos resultados no primeiro ano de implantación das axudas á natalidade animou ao goberno local a facer un maior esforzo económico para beneficiar a estas familias, xa que, segundo José Ángel Santos, este tipo de mecanismos axudan a fixar poboación no municipio.
é necesario que os pais leven máis de dous anos empadroados no municipio e que residan polo menos outros dous tras o nacemento
A base reguladora destas axudas farase pública o próximo 1 de xaneiro, pero nela establécense unha serie de requisitos, como que os pais leven máis de dous anos empadroados no municipio e o compromiso que logo de ter ao bebé sigan residindo no mesmo, polo menos outros dous anos máis.
José Ángel Santos fai fincapé no feito de que este tipo de medidas é tamén posible grazas á "boa situación económica" do Concello, o que permitirá que Friol sitúese como un dos municipios españois con maiores axudas á natalidade.
O desenvolvemento do polígono industrial ou o fomento do sector primario son, segundo o rexedor, algunhas das outras medidas que se toman desde o Concello co obxectivo de fixar poboación.
O municipio de Friol non foi alleo á progresiva sangría demográfica que sufriron a maioría dos concellos rurais da provincia. A principios da década dos anos 40 do pasado século, o número de habitantes era de 10.667, cifra que descendeu aos 3.772, contabilizados no ano 2018.
Emigración
Esta curva descendente foi especialmente acusada ao longo dos anos 60 e 70 por mor da emigración. No ano 1981, o censo era de 5.724 habitantes.