O Concello
Segundo Arias, mediante este programa o Concello concederá axudas a todas aquelas agrupacións de propiedades mediante a figura de permutas voluntarias entre titulares de parcelas de vocación agraria e forestal, co requisito de que "supoñan unha redución dun 20% non número de parcelas con respecto ás iniciais".
Na proposta que levou a pleno, o alcalde defendeu que a agricultura e a gandería son "sectores estratéxicos" e mencionou, entre os hándicaps aos que se enfrontan, a fragmentación da propiedade, a falta dunha cultura de xestión en común da produción, a escasa mobilidade do mercado de terras, a falta de ferramentas que faciliten a planificación aos propietarios e a escaseza de investimento público.
O máximo responsable do executivo municipal criticou con dureza as políticas impulsadas nese ámbito pola Xunta nos últimos anos, chegando a acusar o presidente autonómico, Alberto Núñez Feijóo, de "deixar morrer o rural". Como exemplo, censurou que o Goberno galego anunciase un plan de creación de polígonos agrarios "que non aprobou non Parlamento" e denunciou que non se avanzou en concentracións parcelarias como a de Riomol, "que anunciaron tres veces e dá que non hai nada".
AS BASES, NUN MES. Sobre o plan que se aprobou este mércores, indicou que o Concello ultima as bases -"están case elaboradas", dixo- co obxectivo de levalas no prazo dun mes ao pleno. Avanzou que se valorará que as leiras que se reagrupen estean na contorna de núcleos rurais, xa que ese reordenamento favorecerá a prevención de incendios forestais preto das casas. Tamén adiantou que os veciños que cumpran os requisitos para optar a estas axudas terán un prazo amplo para presentar as súas solicitudes, "duns oito ou dez meses".
En relación aos potenciais beneficiarios, recordou que en Castroverde hai ao redor de 300 explotacións agrarias, con máis de 12.000 cabezas de gando, e uns 600 veciños cotizan na Seguridade Social agraria.
OUTROS ACORDOS. No pleno deste mércores, entre outros acordos, o goberno local tamén sacou adiante en solitario o seu plan de medidas para paliar os efectos da crise polo Covid, que consiste en exencións no pago de impostos municipais para os afectados. Esas medidas aplicaranse nos recibos do auga, o lixo e o saneamento, durante un ano. Ademais, tampouco se cobrarán as taxas por trámites derivados da apertura de establecementos, pola instalación de terrazas de hostalería ou a expedición de documentos.
Arias defendeu que estas medidas son máis eficaces que a concesión dunhas axudas directas "polas que habería que declarar". Así, dixo que haberá autónomos que con estas vantaxes fiscais aforrarán "ata 600 ou 700 euros".
