Máis de 300 corgueses participaron este mércores na comida anual da terceira idade que promove o Concello, que tivo por escenario o pavillón do Ceip. Durante o convite entregouse un obsequio aos dous veciños máis veteranos, que foron Manuel Aldegunde López, con 95 anos, e Adelina Arias López, con 94.
Esta cita en homenaxe aos maiores contou coa presenza do xefe territorial de Presidencia, Gerardo Criado, e unha delegación da corporación municipal encabezada polo alcalde, Felipe Labrada. Na festa da terceira idade, que arrincou cunha misa, sorteáronse entre os asistentes agasallos doados por empresas e negocios do Corgo. Un dúo puxo a nota musical á comida.
