As excepcionais condicións que ofrece o encoro de Portomarín para a práctica de deportes acuáticos animou á directiva do Club Fluvial de Lugo a porse en contacto co Concello para interesarse pola posibilidade de hacerse coa xestión do club náutico da localidade.
O presidente e o vicepresidente da sociedade lucense, Tito Valledor e Gregorio Ramos Misioné, respectivamente, xunto ao director da escola de piragüismo do club, Andrés Román Mangas, mantiveron este venres unha reunión co alcalde, Juan Serrano, na que lle expuxeron esta proposta.
Juan Serrano considerou a idea "como unha excelente fórmula para manter con actividade un edificio que está baleiro durante boa parte do ano" e comprometeuse a intermediar ante a Xunta de Galicia, propietaria da instalación, para que facilite a súa cesión. Para Serrano trátase dunha "excelente oportunidade" de dar contido a este edificio e cualificou como "matrimonio perfecto" a posibilidade que os 17.000 socios do Fluvial de Lugo poidan ser "usuarios potenciais" dunhas instalacións como as do náutico.
CONDICIONES "INMELLORABLES"
O presidente do Club Fluvial, Tito Valledor, destacou pola súa banda as "enormes posibilidades" que ofrece o náutico, cuxo albergue ten capacidade para 80 prazas. Para Valledor, as posibilidades que ofrece o encoro de Portomarín para a práctica de deportes náuticos son "inmellorables" e permitirannos ofrecer un plus engadido ás nosas seccións deportivas de piragüismo, natación e triatlon, que moven cada ano a uns 1.500 participantes.
O presidente do Club Fluvial recorda que en momentos puntuais colaboran coa Xunta para levar ata esta instalación a algunha das súas seccións. De feito ao longo de decembro realizarán diferentes campamentos, pero o obxectivo agora sería "ter unha programación anual", explica.
VERÁN
Ata o momento, a actividade do club náutico de Portomarín vese limitada unicamente aos meses de verán, xa que neses meses a Xunta adoita organizar no albergue un campamento xuvenil.
