As obras de ampliación do centro deportivo D10, situado en Mosteiro (Outeiro de Rei) están en plena fase de execución, polo que a previsión da dirección é que no próximo mes de maio entren en funcionamento as novas dotacións que se engadirán ás xa existentes. Entre estes novos servizos destaca a apertura dunha piscina climatizada, tres novas pistas cubertas de pádel e unha cancha de tenis con homologación da ATP.
O xerente do centro deportivo D10, Leovigildo Real Guerreiro, destaca que a nova piscina climatizada ten un vaso de 25 metros de lonxitude, o que fai que poida albergar todo tipo de cursos de iniciación e perfeccionamento. O tratamento da auga farase, por outra banda, sen ningún tratamento de produto químico, "o que a fai máis saudable".
Os deportes de raqueta son outro dos acenos de identidade deste centro deportivo, que agora verá notablemente incrementada a súa oferta grazas á apertura de novas pistas de pádel e de tenis.
No caso do pádel ás seis pistas cubertas existentes, engadiranse tres novas canchas, "unha delas, unha pista central da clase World Padel Tour", segundo destaca o xerente de D10. Tamén as instalacións reservadas para a práctica do tenis se viron ampliadas con esta actuación, engadíndose ás tres pistas actuais unha nova de resina con homologación da ATP.
Leovigildo Real tamén destaca que a obra servirá para mellorar o polideportivo cuberto utilizado para a práctica doutras disciplinas deportivas.
O orzamento para executar a ampliación deste centro deportivo supera, segundo o seu xerente, o millón de euros de investimento e suporá a creación de catro novos postos de traballo, que se engadirán ao actual persoal, composto por un total de 22 traballadores, entre persoal propio e o de atención aos servizos de restauración e cafetería.
Abonados e uso libre. As novas instalacións poderán ser usadas tanto polos abonados do centro como por aquelas persoas que queiran acceder puntualmente ás instalacións.
Na actualidade, o club D10 suma máis de 1.300 socios, aínda que son máis de 4.000 os usuarios que periodicamente acoden a este centro, inaugurado en xullo de 2015.
Ademais doutros servizos como fisioterapia, ludoteca ou sauna, D10 ofrece tamén ximnasia con actividades dirixidas e cafetería. "É un centro pensado sobre todo para as familias, polo que case todas as fins de semana programamos todo tipo de actividades para os máis pequenos", destaca Real Guerreiro, quen tamén incide na importancia das escolas deportivas, que contan con máis de 300 persoas, repartidas entre os 14 equipos de tenis e os sete de pádel que compiten nas diferentes ligas autonómicas.
