Os usuarios da estrada provincial LU-P-4902, en Portomarín, levaron á primeira hora do mércores unha inusual sorpresa. O viario, que une o Alto do Valiño e Valdeporrás, por Vilaxuste, apareceu arado nun tramo duns 110 metros. A Deputación presentou denuncia ante a Garda Civil, que interrogou a residentes na zona por se algún tiña coñecemento do acaecido durante a madrugada. Os axentes tamén efectuaron medicións sobre o terreo para ver a profundidade dos surcos e analizar cal foi a maquinaria usada.
Técnicos da Deputación desprazáronse ao lugar para avaliar os graves danos, valorados en 90.000 euros. O viario, que serve de enlace coa N-540 que vai de Lugo a Ourense, quedou esnaquizado á altura do quilómetro 2,5, no lugar de Castrolázaro.
Para iso utilizouse "unha máquina grande, que ben puido ser un tractor ou unha paleadora con sublador", segundo persoal do organismo provincial, que habilitou espazo nun dos carriis para garantir a circulación en tanto non se repare o firme.
A Deputación condenou este ataque a un ben público "cunha actuación irresponsable que, xunto ao custo económico, puxo en grave perigo as persoas, e puido provocar danos irreparables para os usuarios desta estrada, xa que os feitos se produciron de madrugada". Ante a gravidade dos feitos denunciados, que unen ao delito de danos outro contra a seguridade viaria, a Deputación esperará á instrución do atestado e ao traslado ao xulgado dos informes da Garda Civil para acudirse na causa e esixir responsabilidades civís e penais.
O autor ou os autores das desfeitas trataron de facer surcos nunha zona con grandes fochancas que no seu día obrigaron a colocar sinais de precaución. Finalmente, fixéronos noutra zona próxima, á que trasladaron os carteis indicativos. Tamén puxeron cintas para advertir do perigo que eles mesmos provocaran.
MALESTAR. O alcalde de Portomarín, Juan Serrano, lamentou que o municipio sexa noticia por esta "barbaridade", pero recordou que a estrada "xa estaba desfeita, co firme en moi mal estado. Hai máis dun ano reclamamos o seu arranxo, tanto nos medios como cun acordo plenario e a través do grupo provincial do PP. Déronnos a razón, ao pór sinais advertindo da perigosidade das fochancas, pero non fixeron nada máis", precisou Serrano.
O alcalde entende que esta actuación "pode vir motivada polo cabreo da veciñanza, xa que se trata dunha estrada provincial moi utilizada por automobilistas e por gandeiros con leiras na zona. O acto non é xustificable, pero hai veciños que se senten vítimas deste abandono".
Os danos en rodas, producidos polas fochancas, son habituais neste viario, como lle sucedeu hai uns días a unha traballadora social do Concello.
