O Concello de Castroverde solicitará á Deputación a entrega e cesión da residencia de maiores da localidade, os terreos sobre os que se asenta a edificación e a xestión do seu servizo. A alcaldía levará a proposta ao pleno municipal, que se celebrará esta tarde, co obxectivo de tomar "as medidas necesarias para abrir xa" un centro cuxas obras se terminaron fai máis de tres anos, pero que continúa sen abrir.
O alcalde, Xosé María Arias, indicou que requirirán ademais ao executivo lucense a achega económica pertinente prevista para sufragar as prazas do centro de maiores, "partida que tamén está prevista para o resto dous municipios da rede de centros dependentes da Deputación". O rexedor asegurou que non ten outra saída para desconxestionar a situación. "Despois de tres anos e medio e dadas as discrepancias que se deron, o Concello ten que mover ficha. Se alguén me garantise que en dous ou catro meses o centro estaría aberto, non teriamos que tomar esta medida. Pero non temos garantías", asegurou.
Arias explicou que se puxo en contacto co presidente da Deputación, Darío Campos, para trasladarlle a súa postura e coñecer a da entidade provincial antes de levar a pleno a solicitude do centro. "Falei co presidente e díxome que vía que a situación non se ía liquidar. Creo que xa esperamos o suficiente", indicou.
Desde o ente provincial aseguraron que non porán ningún problema en aceptar a mencionada solicitude por parte do Concello de Castroverde, xa que a elección do modelo de xestión das residencias pertence "única e exclusivamente" aos Concellos, aínda que sexa a Deputación quen financie o servizo. Do mesmo xeito, a entidade explicou que os outros municipios poden solicitar igualmente a cesión dos terreos e os inmobles se así o consideran oportuno.
A Deputación recordou que as peticións son totalmente independentes, é dicir, a cesión do edificio e os terreos ao municipio correspondente non depende de como se decide levar a cabo a xestión, e viceversa.
Iso si, desde o ente provincial advirten que a xestión exclusivamente municipal, sen convenio de colaboración, podería carrexar un maior gasto na contratación de persoal: "A Deputación, ao marxe de facer o regulamento de acceso e a ordenanza fiscal, presta colaboración para valorar os casos dos posibles usuarios, tramita expedientes e custea todo o equipo multidisciplinar técnico", comentaron desde a entidade provincial.
Este equipo multidisciplinar técnico inclúe empregados como psicólogos, enfermeiros ou animadores socioculturais. Se a xestión é compartida, algún destes profesionais leva a cabo o seu labor en distintos centros, polo que a súa contratación se abarata: "O Concello tomou a decisión de pedir a residencia. Nós temos o dereito e queremos facelo para poder abrila canto antes. Se isto incide en que sae máis caro algún dos servizos, teremos que comprobalo e asumilo", indicou Xosé María Arias.
O alcalde de Castroverde, non entanto, non quixo pór unha data límite para a apertura do centro de maiores. "Unha vez mandemos a petición, depende da Deputación. Non podo marcarme prazos, pero cando nos poñamos a traballar intentaremos que se solucione o antes posible", asegurou o rexedor.
PARTIDO POPULAR. O grupo provincial do Partido Popular, pola súa banda, considera que esta petición por parte de Arias mostra "a absoluta falta de confianza" que os xestores socialistas teñen no proxecto provincial de Darío Campos e Álvaro Santos.
