O alcalde de Castroverde, José María Arias (PSdeG), asinou un "convenio" cunha empresa especializada para a instalación de medidores de gas radón no municipio, dado a elevada porcentaxe de persoas relativamente novas que enfermaron de cancro no concello.
Segundo dixo a Efe, nunha primeira fase medirase a concentración de gas radón en tres puntos do municipio, concretamente nunha zona "granítica", na propia Casa Consistorial e nun colexio da localidade.
Os medidores quedarán instalados este mes de xullo nos dous edificios públicos e en dúas vivendas particulares, para determinar se a presenza de gas radón é "preocupante" para a saúde dos veciños de Castroverde.
Arias confirmou que a empresa que se fixo cargo das medicións presentará os resultados dese estudo no prazo de tres de meses. "A verdade é que isto me preocupa", dixo o alcalde, porque ve como no seu municipio hai persoas "enfermas de cancro con corenta, cincuenta e sesenta anos", o cal é "grave".
O rexedor local recordou que o "radón é un asasino silencioso", dado que segundo a Organización Mundial da Saúde (OMS) é a segunda causa de morte por cancro de pulmón e responsable de entre un 3 e un 14 % deste tipo de enfermidade en todo o mundo.
"Creo que se podemos tratar de concienciar á xente para que tome medidas co radón, hai que facelo", dixo Arias, especialmente "nas zonas graníticas", onde a descomposición da pedra dá orixe a este gas.
