Despois de que en 2016 fose aberto ás visitas, tras unhas laboriosas obras de restauración, o castelo de Pambre consolidouse como unha das principais atraccións turísticas do municipio de Palas de Rei. Boa proba diso é que o ano pasado recibiu a visita dun total de 12.400 persoas, o que supón unha lixeira baixada con relación ás 13.000 de 2018.
Pero máis aló destas pequenas oscilacións, a realidade indica que o número de visitantes da fortaleza tende a estabilizarse ao redor da cifra alcanzada este ano. Non en balde, en 2017, primeiro ano completo no que o castelo estivo aberto ás visitas, foron 12.000 persoas as que o quixeron coñecer.
Os grupos de escolares teñen un cada vez maior peso dentro do número total de visitantes. O ano pasado, este colectivo supuxo un 70% do total, é dicir, uns 8.700 alumnos de toda Galicia e de diversos lugares de España, como Madrid, puideron descubrir en 2019 a fortaleza.
Dentro do apartado de visitas organizadas, tamén foi notable a afluencia de todo tipo de asociacións culturais ou de xubilados.
O resto de visitas foron de particulares, moitos deles peregrinos, que ao seu paso por Palas de Rei decidiron desviar os seus pasos para poder coñecer de cerca esta impoñente edificación que forma parte intrínseca da historia da comarca da Ulloa.
En canto aos días de máis afluencia de público, o alcalde de Palas de Rei, Pablo Taboada, sinala "os mércores e sábados" como os de maior número de visitantes.
Esta circunstancia explícase polo feito de que os mércores a entrada é gratuíta, mentres que os sábados débese "ao tirón do fin de semana, que fai que moitas persoas se despracen ata a zona para pasar o"día , destaca o rexedor.
Pablo Taboada tamén indica que en 2020 manteranse os mesmos horarios de visita que o pasado ano. Deste xeito, ata o próximo 31 de marzo, a fortaleza será visitable en horario ininterrompido de 12.00 a 17.30 horas. Pola contra, entre o 1 de abril e o 31 de outubro, o horario será de 11.00 a 14 .00 e de 16.00 a 20.00 horas.
Pola súa banda, os grupos organizados poden concertar as súas visitas chamando ao teléfono 628.26.22.51.
OUTRAS ACTIVIDADES. Ao longo do pasado ano, a sala de exposicións do castelo de Pambre tamén acolleu numerosas mostras, organizadas en practicamente a súa totalidade polo Instituto de Estudos Ulloáns (IEU).
En 2019, a fortaleza tamén foi un dos principais escenarios do Son d'Aldea, unha recreación teatralizada da vida das aldeas a principios do século XX.
