A xornada de caza do sábado en Castroverde saldouse coa captura dun superxabaril de 145 quilogramos de peso. Un exemplar de gran tamaño, que segundo explicaron algúns cazadores, non é habitual atopar en zonas montañosas, aínda que si noutros puntos da Península coa orografía máis chaira.
O cazador lucense Antonio Duarte, coñecido como Toñín de Balbino en Castroverde, onde ten raíces, foi o encargado de abater o animal na zona de Vilafrío. Foi unha captura que causou expectación entre veciños e os seus propios compañeiros de cacería.
O home atopábase de caza coa cuadrilla Francelos. "O xabaril estaba escondido nun piñeiral rodeado dunha leira de millo dunhas 200 hectáreas. Quince persoas cercamos a zona e cando saíu viña cara a min. Facía un ruído como o dun tractor. Esperei a que saíse a un claro e abatino cun tiro na cabeza", explica Duarte, que nos seus 27 anos como cazador non recorda ver un xabaril similar.
TRASLADO COMPLICADO. Para trasladar o grande exemplar foron necesarias seis persoas. "A xente dos pobos próximos parábanos para ver o animal e darnos as grazas porque tiñan todas as leiras esnaquizadas", recalca o home, quen asegura que se trataba dun "macho dominante de idade xa adulta".
O exemplar xa foi despezado e conseguíronse máis de cen quilogramos de carne.
