Un lustro despois de que o dirixente local de Baralla, o popular Manuel Jesús González Capón, fixese nun pleno as polémicas declaracións asegurando que as vítimas do franquismo "merecíano", o rexedor volve estar no foco da polémica polas súas intervencións nas sesións plenarias. A oposición, formada por PSOE e BNG, denuncia continuas "faltas de respecto" e afirmacións "fóra de lugar" cara a veciños e membros da corporación.
Desde o PSOE aseguran que o alcalde profire cualificativos despectivos como "pájaras" para dirixirse a varias mulleres da directiva dunha entidade local, mófase da veciñanza ou ameaza con expropiar terreos dun edil.
O portavoz socialista, Jaime González del Rio, sinala ademais que en varias ocasións denunciaron que as actas das sesións plenarias "non reflexaban correctamente ou que se falaba non pleno" incluso solicitando explicitamente que constase en acta. "Nunca aparecía nada coa escusa de que a secretaria non o escoitaba ou decindo que non tiveran en conta a miña petición porque falaba moi baixo e non recollían moitas cousas", remarca.
GRAVACIÓNS. Ante esta situación desde o PSOE decidiron levar a situación ante a Valedora do Pobo e empezaron a gravar as sesións plenarias o pasado ano.
González Capón non quere axudas para a natalidade porque "de facerse efectivas vos xitanos terían fillos cada tres meses"
Así, González do Río pon de exemplo que no pleno de decembro de 2017, ante unha proposta dos nacionalistas para solicitar axudas á natalidade o rexedor rebate que "iso é para estratos baixos e engade que de facerse efectivas vos xitanos terían fillos cada tres meses porque total non os coidan". O socialista cualifica de lamentables "e reproblables" este tipo de descualificativos.
Outra das "faltas de respecto" ás que fai referencia son "burlas cara a veciños, sobre todo se non son do seu cor político". De feito, na sesión de xullo do pasado ano, ante a petición do PSOE de arranxar dúas rúas de Baralla González del Río afirma que "o alcalde rise dos habitantes dicindo que esa obra non se pode facer porque enterraron as súas casas e mófase doutro que lle pediu arranxar unha zona dicindo con desprezo: "claro vén de Madrid e mancha os seus zapatos"".
A estas críticas súmase o portavoz do BNG, Xosé Manuel Becerra, quen sinala que "os tons despectivos son a súa dinámica habitual", ao que engade que "non é de estrañar recordar as lamentables declaracións sobre o franquismo do 2013 e a pesar de todo o PP deixouno no posto". Becerra censura a actitude do alcalde e remarca que "son afirmacións que non se poden consentir".
RESPOSTA. O rexedor, pola súa banda, achacou estas acusacións a frases "sacadas de contexto". Remarcou que "non teñen asumido que o PP está no equipo de goberno con maioría absoluta e queren polemizar con mentiras". Asegurou ademais que os plenos de Baralla "son uns dos máis democráticos que existen onde todos poden opinar" e recalcou que todo o que se trata neles "consta en acta, aínda que é imposible que se faga de xeito totalmente literal".
