O portavoz do BNG no municipio lucense de Outeiro de Rei, Xosé Ferreiro, presentou unha iniciativa para que o pleno do Concello reprobe ao alcalde, José Pardo Lombao, por mentirlle “á Valedora do Pobo”, ademais de solicitar “a inmediata dimisión do cargo que ostenta”.
Ferreiro asegura que se pode “comprobar dunha forma totalmente obxectiva” que o alcalde “mentiu dunha forma descarada no escrito de contestación” á Valedora do Pobo “ante a queixa que presentara o BNG” por non ter acceso “á documentación” que xustificaba “as dietas por desprazamentos do alcalde e do tenente alcalde”.
Para o BNG, a xustificación do goberno local tiña “como único obxectivo” intentar “tapar as chanchulladas e cacicadas que se fan co cobro de dietas por desprazamento no Concello de Outeiro de Rei por parte do alcalde e o tenente de alcalde”.
Para Ferreiro ese tipo “de actitudes son deplorables en calquera persoa, pero moito máis nun cargo público” que, ademais, ten a “obrigación ineludible” de dicir “sempre a verdade”, especialmente nunha “resposta por escrito a unha entidade que debería ser respectada por todos e por todas, como é a Valedora do Pobo”.
