A augardente volveu espertar este domingo a chispa de Portomarín, que se encheu de xente para exaltar este produto tan autóctono e tamén para desfrutar la VIII Degustación da Anguía, dous símbolos de Portomarín que comparten protagonismo cada domingo de Semana Santa desde hai anos.
Co encendido de alquitaras na praza da vila deu comezo a festa. Pinga a pinga, o augardente foi brotando al longo da mañá, mentres os asistentes á celebración se foron congregando.
A chispa da augardente prendeu tamén no pregoeiro, honra que este ano lle tocou a Moncho Borrajo. O humorista pronunciou un pregón en verso no que exaltou os produtos propios, como era de esperar, pero tamén repasou a historia de Portomarín e como marcou o que hoxe é o concello. Lembrou a construción do encoro e o que supuxo para o municipio, pero tamén o que quedou baixo a auga.
CABALEIROS E DAMAS. Antes do pregón, Borrajo foi nomeado cabaleiro da Orde Serenísima da Alquitara, un colectivo que ten como función exaltar os valores da augardente e dalos a coñecer aló onde se atopen os seus membros.
A Orde Serenísima da Alquitara investiu 16 novos cabaleiros e damas, entre os que se atopa o propio pregoeiro da festa
Nesta edición, ademais de Moncho Borrajo, ingresaron na orde outros cabaleiros, como o alcalde do Vicedo, Jesús Novo Martínez; o de Monterroso, Miguel Rico Gómez; o tenente de alcalde de Portomarín, José Pérez Fernández; o comisario Manuel Vázquez López, o escritor Cristóbal Atienza Gutiérrez, o presidente do club ciclista Muralla, Perro Torréns Villapunt; o garda civil Alejandro Rodríguez Vázquez, o fisioterapeuta Sergio Mayo Zubiela e o Club Lucus Caixa Rural.
Como damas da alquitara ingresaron as conselleiras Ethel Vázquez Mourelle e Beatriz Mato Otero, que non acudiron ao acto de investidura; a alcaldesa de Melide, Dalia García Couso; a deputada provincial socialista Pilar García Porto; a presidenta de Fademur, Rosa Arcos Caamaño, e a presentadora do programa Abuela Lolita, do Canal Cocina, Dolores Valcárcel Díaz.
Os novos membros da Orde Serenísima da Alquitara, acompañados por outros xa veteranos, tiveron ocasión de participar nunha cata de augardente, para comezar a honrar o produto que a partir de agora deberán promocionar.
O alcalde de Portomarín, Juan Serrano, destacou o bo desenvolvemento da xornada e a gran afluencia de xente, ansiosa de desfrutar ao aire libre dun día sen chuvia e dunha festa ben arraigada na vila.
