A asociación de recreación histórica A Castronela de Friol celebrou eleccións para renovar a xunta xestora por segunda vez desde a súa creación.
A nova directiva pasa a estar formada por José Antonio Viña Carreira, como presidente; Ana Isabel Castro Rodríguez, secretaria e Antonio Rumbo Ramos, como tesoureiro. Os novos elixidos agradecen as bases de traballo establecida polos seus antecesores -Manuel Castiñeira, Jesús Penín e Lucía Ríos- que ocuparon o cargo durante catro anos, o máximo que aparece estipulado nos estatutos.
A entidade cumpre este ano 2019 o seu cuarto aniversario e tal e como se recolle na acta de constitución da mesma débense celebrar comicios cada bienio. Deste xeito "pretender dinamizar o campo de xestión para impedir o estancamento da mesma e poder desenvolver unha nova forma de traballar polo futuro da asociación", explican os seus socios fundadores.
A recentemente nomeada xunta xestora sinalou que contará coa experiencia e co apoio dos anteriores directivos para seguir esforzándose para crecer como asociación e pór en marcha novos proxectos.
OS SOCIOS, A CLAVE. A nova dirección da Castronela transmitiu que seguirán traballando para continuar o camiño marcado polos socios "para así potenciar as súas virtudes, partindo sempre do consenso. O punto forte desta agrupación é cada uns dos socios e socias que a forman, sen eles non sería posible levar a cabo cada un dos proxectos que teñen en marcha", destacaron.
Os novos responsables da entidade friolesa agradeceron ademais o grande apoio mostrado polos seus compañeiros desde o momento en que presentaron a súa candidatura "vímonos totalmente arroupados e demostráronnos a súa confianza mediante o seu voto", resaltaron.
