O alcalde de Outeiro de Rei, o popular José Pardo Lombao, asegurou este mércores que lle "preocupa" a alta incidencia do covid no seu municipio, á vez que destacou que a única saída posible pasa "por vacinar, vacinar e vacinar", polo que reclama "claridade meridiana" na repartición de doses.
O municipio de Outeiro de Rei incorpórase ao nivel alto de restricións tras 37 positivos que elevan a incidencia a 14 días en máis de 700 contaxios por cada 100.000 habitantes.
Pardo Lombao aproveitou, a continuación, para recriminar ao Goberno central como se produce a repartición das vacinas, coa última partida extraordinaria de Pfizer á que se mantivo allea a Galicia. "Esa remesa que non veu a Galicia é dificilmente entendible. é un tema preocupante porque a repartición das vacinas non tería que estar politizada e debería de facerse con claridade meridiana", sinalou.
Dos contaxios, o alcalde de Outeiro de Rei constata que estes 37 positivos repártense "entre catro ou cinco familias, e algún caso solto", e celebra que "non" estea "ningún hospitalizado, e non están graves".
No entanto, José Pardo Lombao admitiu que "claro" que está "preocupado" con estes casos que levaron ao municipio ao nivel alto de restricións polo covid.