A Asociación Nacional de Criadores de Raza Rubia Galega (Acruga) celebrará este fin de semana no recinto feiral de Adai, no municipio lucense do Corgo, a primeira poxa e exposición desde a reelección de César Dorado como presidente deste colectivo, tras imporse aos outros dous candidatos no último proceso electoral.
César Dorado confirmou na presentación desta primeira cita que foron inscritas para participar na feira un total de 120 reses da raza loura galega, entre machos e femias, das cales 68 entrarán no concurso para elixir aos mellores exemplares. En canto á poxa, o presidente de Acruga precisou que serán postas á venda 22 cabezas, das cales 8 son machos e o resto son femias.
Ademais, aclarou que 10 exemplares proceden directamente do Centro de Recría que ten Acruga na Granxa Provincial Gayoso Castro, grazas a un convenio coa Deputación Provincial de Lugo. Dorado afirmou que os participantes na feira gozarán dunha poxa e dunha exposición moi completas, dado que tantos os gandeiros como Acruga presentan "grandes exemplares". "Vai merecer a pena", insistiu.
