Os físicos belga François Englert e británico Peter Higgs gañaron hoxe o Premio Nobel de Física 2013 por postular a existencia da partícula subatómica coñecida como bosón de Higgs, anunciou a Real Academia de Ciencias de Suecia.
No seu fallo a institución argumentou que ambos os dous reciben este galardón polo "seu descubrimento teórico dun mecanismo que contribúe ao noso entendemento da orixe das partículas subatómica con masa".
A Real Academia de Ciencias explicou que un equipo de físicos postulou teoricamente a existencia deste mecanismo en 1964 e que "recentemente foi confirmado polo descubrimento das partículas fundamentais preditas" en experimentos no Centro Europeo de Física de Partículas (CERN).
Englert e Higgs recibiron este mesmo ano o premio Príncipe de Asturias de Investigación.
Englert naceu en 1932 en e exerce na Universidade Libre de Bruxelas, mentres que Higgs naceu en 1929 e exerce na Universidade de Edimburgo (Reino Unido).
O anuncio deste galardón estivo marcado polo inusual atraso do acto, que estaba inicialmente convocado para as 09.45 GMT e que tan só uns instantes antes desa hora pospúxose sen alegar motivo algún, ao principio 30 minutos e finalmente 60.
Os gañadores deste premio, dotado con oito millóns de coroas suecas (922.000 euros ou 1,3 millóns de dólares), a mesma cantidade que o ano pasado pero un 20% menos que en 2011, seguen na nómina do Nobel de Física ao francés Serge Haroche e o estadounidense David J. Wineland, que obtiveron o premio na última edición.
A Real Academia de Ciencias de Suecia concedeulles este galardón en 2012 polos seus traballos sobre a interacción entre a luz e a materia.
Mañá darase a coñecer o nome dos gañadores do Nobel de Química; e o xoves e o venres, o de quen obteñan o de Literatura e da Paz, respectivamente, para concluír o vindeiro luns, co anuncio do de Economía.
A entrega dos Nobel realizarase, de acordo á tradición, en dúas cerimonias paralelas o 10 de decembro, en Oslo para o da Paz e en Estocolmo os restantes, coincidindo co aniversario da morte de Alfred Nobel.
Higgs, "atafegado"
O físico británico Peter Higgs admitiu hoxe sentirse "atafegado" tras recibir o Premio Nobel de Física xunto ao belga François Englert, por postular a existencia da partícula subatómica coñecida como "bosón de Higgs".
Nunha declaración divulgada a través da Universidade de Edimburgo (Escocia), o investigador británico, de 84 anos, tamén felicitou a todos os que traballaron para conseguir este avance.
Ao dar a coñecer o premio, a Real Academia de Ciencias de Suecia argumentou que os dous científicos son distinguidos "polo seu descubrimento teórico dun mecanismo que contribúe ao noso entendemento da orixe das partículas subatómica con masa".
