ALBERTO CORBACHO, xogador do Obradoiro:
''Non teño dúbidas de que a eliminatoria será moi dura''
Alberto Corbacho foi unha xogador clave na eliminatoria que enfrontou ao Blu Sens Monbús e ao Cáceres ao anotar nos catro partidos unha medida de case 19 puntos. O ex xogador do Breogán augura agora un play off ante o equipo lucense «moi duro». «Dous equipos galegos loitando por estar na final leva un plus de motivación, de intensidade e non teño dúbidas de que será unha eliminatoria moi dura», di .
Nesta liña, Alberto Corbacho está convencido de que o encontro que esta tarde abre a serie «vai ser moi importante» e por iso cre que «o inicio vai ser moi forte, tremendo». «O Breogán vai vir a por todas e nós tamén temos que saír con toda a intensidade posible. Ademais, estará a motivación de todos os xogadores, a presión do pavillón, as afeccións... todo isto fará que sexa un partido moi intenso», sinala.
Para o beirado mallorquino, «o nivel marcarano as defensas e ambos os equipos teñen un nivel alto nesta faceta». «Nós temos que facer o noso xogo, defender forte e correr se se pode, pero sobre todo levar o ritmo do xogo», engade.
Do Breogán, Corbacho destaca que se trata dun equipo «moi físico que ten grandes xogadores e chega nun gran momento de forma». «Isto é o máis perigoso, chegan con moita confianza e non teñen nada que perder porque tal e como foi a tempada ao final chegaron ás semifinais e tocoulles enfrontarse coa cabeza de serie no play off. Pero está claro que van loitar e a intentar sacar algún dos dous primeiros partidos para ir con vantaxe a Lugo », comenta Corbacho.
O máximo triplista do Blu Sens destaca a Feldeine, «que está a ser o referente a nivel anotador pero hai outros xogadores como Arteaga, Vallmajó que está a xogar moi ben, Betinho... teñen xogadores que achegan en todas as facetas». «Temos que traballar sobre todo o colectivo non sobre xogadores en concreto», di.
Corbacho considera ao seu equipo favorito e sinala que «o factor cancha é importante porque nos axuda moito».
JORDI VALLMAJÓ, base do Breogán:
''A todos gústannos estes partidos''
Jordi Vallmajó encara a eliminatoria ante o Blu Sens con ilusión e confianza. Así o asegura a base catalán: «o simple feito de superar a eliminatoria ante o León ilusiónanos moitísimo e creo que nos dá un plus de confianza pola forma no que o fixemos, gañando os partidos nos tramos finais».
O xogador breoganista asegura que non lle inquieta ter que enfrontarse ao que para moitos é o máximo favorito ao ascenso. «A verdade é que con tal de pasar a anterior eliminatoria dábame igual o rival que nos tocase. Pero está claro que a calquera xogador gústalle xogar partidos como os que imos vivir, polo ambiente, porque se fala moito e porque creo que vai ser unha festa para o baloncesto galego. Ao xogador gústalle sentirse parte desta festa e dunha eliminatoria que crea tanta expectación», di.
Jordi Vallmajó engade que o seu equipo afrontará os encontros ante o Obradoiro «sen presión e con moita ilusión», pero engade que non se vai a renunciar a nada». «Só pensamos no primeiro partido, sobre todo queremos gozar deste encontro, que imos ir a gañalo. Todos somos conscientes de que non hai presión pero non renunciamos absolutamente a nada», insiste.
O Obradoiro derrotou ao Breogán nos dous encontros da fase regular. Para a base, con todo, esta circunstancia xa non ten valor. «Xa pasou o mesmo contra o León. O que se fixo en Liga xa non vale para nada. O Obradoiro acabou a liga na segunda posición con máis vitorias que nós pero agora mesmo estamos no mesmo sitio. Creo que vai gañar o que se esqueza do que fixo no último partido. Ante León nós esquecémonos do primeiro partido e gañamos o segundo e logo esquecémonos deste e gañamos o terceiro...», di.
