A Xunta de Galicia investiu 1,2 millóns de euros no municipio de Cervantes, o máis afectado da provincia de Lugo pola onda de incendios que arrasou Galicia en outubro de 2017, para a recuperación de terreos e de bens, tanto públicos como privados.
Así o confirmou este xoves o delegado territorial da Xunta de Galicia en Lugo, José Manuel Balseiro, durante a visita que realizou ao lugar de Pando, para comprobar a marcha das obras de rehabilitación que financia a administración autonómica para rehabilitar unha vivenda que quedou destruída polo lume.
O delegado recordou que, tal e como estaba previsto, o goberno galego colabora coas obras de reconstrución da vivenda mediante a achega de 102.000 para completar os traballos.
"Estivemos desde o primeiro momento cos afectados, e particularmente con este veciño, que o perdeu todo nos incendios; ofrecémoslle diversas posibilidades, desde un bono de aluguer ata unha vivenda social e axudámoslle a financiar a opción que el elixiu, que é recuperar a súa casa", dixo Balseiro.
Ademais, neste mesmo municipio, moi castigado polo lume, a Xunta outorgou outras 44 axudas a particulares, por un importe global de 257.700 euros.
Medio Rural tamén gastou case 700.000 euros en traballos para estabilizar o chan e evitar o arrastre de sedimentos, así como outros 143.00 euros en tarefas de recuperación do bosque queimado.
