A Consellería de Cultura e Turismo adxudicou por máis de 161.628 euros o contrato de reparación, restauración e conservación preventiva do conxunto etnográfico que forman as pallozas do Cebreiro, en Pedrafita.
O delegado territorial da Xunta de Galicia en Lugo, José Manuel Balseiro, explicou que a empresa adxudicataria destes traballos, que é Resconsa, disporá agora dun prazo de catro meses para executar as actuacións programadas.
O contrato prevé actuacións nas catro pallozas que forman o conxunto etnográfico -Museo, Couzón, Campelo e Galán-, coa substitución total da palla das súas cubertas en tres delas e parcial na de Couzón, onde se aproveitará aquela que aínda se atope en boas condicións.
Ademais, o proxecto tamén contempla a reparación das laxas dos accesos, así como melloras na instalación eléctrica e no sistema de iluminación.
Tamén serán aplicados tratamentos para evitar que as estruturas de madeira sexan atacadas por insectos xilófagos.
As pallozas do Cebreiro forman un conxunto etnográfico que ocupa uns 300 metros cadrados e están localizadas no núcleo histórico por onde entra en Galicia o Camiño Francés a Santiago de Compostela.
Están situadas na contorna do santuario de Santa María do Cebreiro, do século X, e tres delas están musealizadas, mentres que a cuarta -Campelo- utilízase como almacén.
