A Audiencia Provincial de Lugo acollerá o xoves, día 18, o xuízo a un home que está acusado dun delito de apropiación indebida, tras presuntamente negarse a devolver un tractor que lle deixaron, propiedade na actualidade do fillo da súa exparella. O ministerio fiscal solicita un ano de prisión para o procesado.
Os feitos polos que será xulgado, ocorridos na Fonsagrada, remóntanse a outubro de 2012, cando a exparella do acusado entregoulle o tractor, marca Lander e taxado pericialmente en 6.450 euros, en concepto de préstamo para o seu uso temporal, segundo se indica no escrito da Fiscalía.
Un ano despois, o 24 de outubro de 2013, cando a muller llo reclamou, este non llo entregou, situación que aínda se mantén, precisa a Fiscalía, que tamén solicita a restitución do vehículo se se atopa en perfecto estado para o seu uso ou unha indemnización igual ao seu valor.
O xuízo por estes feitos ía celebrarse o pasado mes de outubro na Audiencia Provincial de Lugo, pero foi suspendido e desenvolverase finalmente este xoves.
