José Argul Fulgueira celebrou este domingo os seus 50 anos como párroco de Vilabol de Suarna, na Fonsagrada, rodeado por máis de 200 veciños que quixeron aproveitar as súas vodas sacerdotais para renderlle unha cálida homenaxe.
A igrexa parroquial fíxose pequena para acoller a todos os que quixeron saldar coa súa presenza a débeda que afirmaron ter co seu párroco, que oficiou unha misa antes de reunirse cos veciños nunha comida popular, e tras destapar a placa que sempre lle recordará á entrada da igrexa.
E é que, ao longo dos seus 50 anos de exercicio, o compromiso sacerdotal fíxose extensivo a un compromiso diario cos seus veciños, nunha traxectoria que estes definen como exemplar.
O seu labor pastoral excedeu con fartura os muros das igrexas onde oficiou misas durante décadas. Ademais de tender pontes entre ceo e terra, José Argul, chegou a acurtar as distancias entre aldeas construíndo pistas, ou incluso unha ponte de madeira que uniu a aldea de Vilabol coa de Xegunde. Tamén coidou con esmero o patrimonio, axudando a restaurar capelas e casas.
Os veciños regaláronlle unha foto dos seus pais, que se sumou á emoción polo agarimo recibido.
