Varios veciños de Cervantes mostraron as súas queixas polo corte da estrada LU-P-1401, que une Doiras con Piornedo. A vía está pechada desde o pasado verán, cando as choivas provocaron unha serie de desprendementos que danaron a estrutura por completo.
"Está cortada, sen sinalizar e non hai alternativas. Os que vivimos aquí temos que desviarnos por outros lados e os que non saben como está a estrada, atópanse co corte e teñen que acabar dando a volta porque non se indican os itinerarios alternativos", asegurou un dos veciños afectados.
Desde a Deputación explicaron que os técnicos entenden o malestar dos veciños coa situación, pero recordaron que as obras son bastante complexas de realizar e que non se pode abrir a estrada ao tráfico ata que o traxecto afectado se repare, sexa completamente seguro e o firme estea preparado para resistir outro posible desprendemento.
